عاداتنا في رمضان وكيف نقضي هالشهر الكريم ارجو التثبيت

الحمدلله والصلاة والسلام على اشرف الانبياء والمرسلين نبينا محمد وعلى اله وصحبه اجمعين ومن تبعه باحسان الى يوم الدين ...
قبل كل شي ابغى اقولكم احنا داخلين على شهر فضيل بعد ايام
شهر كريم تكثر فيه البركه
شهر القران الكريم لانه انزل فيه
شهر يغفل الكثير منا عن فضله
ويغفل الكثير منا عن ان الله سبحانه وتعالى عندما يبلغنا اياه
قد بلغنا رحمته ومنه علينا
شهر التوبه
شهر يتقرب الناس الى الله بالاعمال الصالحه
وهو شهر الخير شهر رمضان المبارك
اسأل الله ان يبلغنا شهر رمضان ونحن في اتم الصحه والعافيه
وان يرزقنا صيامه وقيامه على اكمل وجه
وان يجعل اوله رحمه لنا واوسطه مغفره واخره عتق رقابنا من النار
انه سميع بصير
حبايبي اعضاء سما الغالين على قلبي ..
في هذا الموضوع ابغى الكل يشارك
نبغى نعرف عاداتنا في رمضان لان كل دوله تختلف عن الثانيه ومو بس كذا
كل مدينه تختلف عن المدينه الاخرى
يعني عندنا في الإمارات
اهل دبي عندهم عادات غير عن هل العين وهل العين غير عن راس الخيمة
يعني كل إماره لها عادات غير عن الإماره لثانيه
وأنه أروم اعرف كل واحد فيكم كيف يقضي يومه في رمضان
نبغى نأثر في بعض بس لصالحنا يدخل علينا الشهر ان شاء الله واحنا مخططين لاعمال نكسب فيها الاجر الكبير باذن الله
نبغى نعرف كيف الواحد منا يقضي يومه
ابدأ انا :
انا لي سنتين مداومداوم على الشي الي بقوله لكم الحمدلله
طبعا الكل يعرف ان رمضان يبدأ واحنا ندرس
اصحى الصباح الساعه 9ونص واروح الجامعه
اخلص من الجامعه امر السوبر ماركت
اشتري اغراض الفطور الي هلي وصوني عليها
اخلص من السوبر ماركت
على البيت
أطالع المذكرات وشوي أطالع السياره واغسله
الاطباق الرئسيه عندنا :
الشوربه
السمبوسه
والسلطات بانواعها
المكرونه
اي نوع حلى ..والفواكه
هذي ضروري على السفره (( شرات هل السعودية تقريباً ))
الاضافات : تكون المعجنات وانواع الحلا الباقيه
وبعده تجتمع ويا العائله ع الفطور وانه بس اناظر ساعتي واتريا المؤذن
وبعدين نفطر مثل ما عودنا الوالد الله يحفظه ناكل التمر ويا القشطه ونسير حق المسيد ونصلي وبعدها نرجع ونكمل الفطور
ابعد الفطور نطالع (( الجميع )) التلفزيون وبعد انه ما اروم اكل وياد ع الفطور عسب (( عشان)) اقدر اصلى التراويح طبعا في قريب منا مسيد فيه امام ماشا الله ع صوته اخشع غصب ونصلي وبعد الصلاه ارجع ميت من اليوع وادخل المطبخ وأكل شي خفيف واروح اجلس في الغرفه اقرأ قران (( أحياناً))
وبعدها أطلع ويا ربعي ونسير حق الشباب
التلفزيون ماني وياه ربع حيل اطالعه قليل
وفي العشر الأواخر نسير حق السعودية عسب العمره وياااااااد زحمه واكيد اجرها كحجه ويا الرسول صلى الله عليه وسلم
وانه اتعشى متأخر حوالي الساعه 2,50ص والسحور في وقته وما انام في الليل الا نااادراً
وهذا يومي في رمضان
بس يتغير في العشر الاواخر
عشان صلاة التهجد
وطبعا مثل ماقلت لكم هذا الشي له سنتين وياي
بس يعني رمضان الي فات والي قبله
وان شاء الله كل رمضان وانا افضل
وجدولي ممكن يتغير لكن هذي اهيا القاعده
اممممممم شنو بعد ؟؟؟؟
نسيت مااقولكم شي مهم اني الحمدلله اختم القران مره وحده (( صدق مقصر )) لكن
الحمدلله ... (( احب اوضح نقطه بعض الناس يختم القران اكثر من ثلاث مرات احب اقول لكم لزم الأنسان يتدبر الأيات مو جي سريع سريع مايستوي ))
اسأل الله ان يتقبل مني ومنكم صالح الاعمال
يلا لاتحرموني مشاركاتكم الطيبه ...
وراوم كل واحد يراوني شنو يستوي وياه في هالشهر الكريم عسب نستفيد من بعض تقبلوا تحيات اخوكم عابر سبيل